Puisqu'i n'a gné ène plache pou dviser in cras patois, de m'sus dit qu'i n'awo foc à "squatter" ec forum-ci, pou emplouyer ée mot à l'môde.
On véra bié si l'ouèbmastère me rue au diâb ou si i trouève ça à s'bon goût.
Samedi vét-six de novembe, el djoû qui suit l'Séte-Catherine...
D'awo l'âme d'ée scriveû au matégne.
Quand d'm'ai dérinvillé et qu'd'ai vû m'gardègen ercouvert pa l'nîve, d'n'awo foc invie d' edmorer au caud contre ème fème adorée. Mais bon... l'z infants sont l'z infants eyé... il a bié follu desquinte pou leyé m'belle-fiye d'aller courri à l'huche, fée des boules, des bonhommes eyé mînme ée sapégne aveu n'pougnée d'nîfe bie frèche.
Les glènes in l'poulailler dmeurôtent l'eugne conte l'aute pou s'inrcaufer. D'leu ai baillé deu-twois pougnées d'maïs eyé ravisé à c'que leu iau n'sinsse gné dgélée. Elz astôtent tant ingourdies qu'elles ont dmoré dlée mi sins awo peu. Mais qu'c'in biette, hein ?, des pouilles !
Après l'djuner, nos avons sté à l'Commune. Em fème n'est gné co m'fème ! Nos avons don pris les dispositions pou nous marrier. Il a pou croire que d'awo djà sté marriés ée caup d'vrot nos fér reflechir ène miette... mais d'ée n'aute costé... on n'peut gné toudis croire que l'mariâche est ène biestrie. Pou mi, ed pinse sécèremint qu'c'est co ène bonne idée... Pouwo s'dire qu'on st'à elle, qu'elle est à vous, mette alintours des tralalas officiels...mi, c'est co m'goût !
Et puis, quand ed'dis à m'future qu'on pourrot s'ermarier, qu'elle mè ravise in bachant les zies et en riant, foc pasque'elle ne sée gne ertenir l'tension à s'n estoumaque... Mi... d'sus pierdu tellmint que d'sus binaise...
 |
M'inscrire 
Me connecter 
Mot de passe oublié 
Retour au forum
